Eleksen blong Eria Kaonsel blong Jif, Aelan, Urban mo Malvatumauri Kaonsel blong Jif bae I tekples long Septemba mo Oktoba yia ia.

Prensipol Elektoral Ofisa I apointem ol ofisa blong Malvatumauri mo Kastomari Land Manejmen Ofis blong kontaktem ileksen ia truaot long Vanuatu.

Kavnans mo Komplaens Ofisa blong Malvatumauri, Crimson Bani I talem se ol kaonsel blong jif ia oli wok 5 yia mo term blong olketa I kam long end blong hem long manis Oktoba.

Hemi se eleksen blong ol eria mo aelan kaonsel blong jif bambae I stap long full manis Septemba, Port Vila mo Luganville long 11 Oktoba mo Malvatumauri Kaonsel blong Jif long 23 kasem 27 Oktoba 2023.

Crimson Bani I explenem se bifo eleksen, ol nakamal I stap toktok finis blong faenem ol man blong olketa we bae oli wok long eria kaonsel blong jif.

Olketa ia nao bae oli elektem representative blong aelan kaonsel blong jif mo aelan kaonsel bae oli elektem representative blong olketa we bambae I kam memba blong Malvatumauri Kaonsel blong Jif.

Kavnans mo Komplaens Ofisa blong Malvatumauri I adem se wan samting I spesel long eleksen blong ol jif, kastom consensus nomo I toktok mo jusum pipol blong go long kaonsel blong jif.

Hemi gohed blong explenem se folem loa blong ileksen oli priperem nomo ol ballot box mo envelop blong kastem mo ofisa I travel wetem I go long ol aelan mo ranem eleksen. Mr Bani I pointemaot se bambae i festaem long histri blong Malvatumauri I ranem ol ileksen ia folem ol standed kraeteria mo hemi folem fasin blong gud kavnans blong pipol I mas folem blong kontestem ileksen blong jif.

Indaksen blong evri kaonsel blong jif truaot long Vanuatu bambae I tekples samtaem eli long nekis yia.

Vanuatu I gat wan total blong 78 eria kaonsel blong jif 20 aelan kaonsel mo 1 nasonal kaonsel blong ol jif.